Arıqlamaq və sağlam qalmaq arzusu bəzən insanları olduqca qəribə yollar sınamağa məcbur edir. Dünyada qısa müddətdə məşhurlaşıb sonra ya təhlükəli, ya da təsirsiz olduğu üçün gündəmdən düşən bir çox qeyri-adi pəhriz var.

Patrulaz.az onlardan bir neçəsini təqdim edir:

Kələm şorbası pəhrizi

Bir həftə ərzində demək olar ki, yalnız kələm şorbası yemək üzərində qurulub. Çox sürətli çəki itkisi vəd etsə də, orqanizmi ciddi şəkildə vitamin-mineral çatışmazlığına sürükləyə bilir.

Uşaq qidası pəhrizi

Hollivud məşhurlarının bir vaxtlar sınadığı bu pəhrizdə gün ərzində bir neçə porsiya uşaq püresi yeyilir. Məqsəd az kalori qəbul etməkdir, amma uzunmüddətli istifadəsi zərərlidir.

Mavi işıq pəhrizi

Qida qəbulundan öncə yeməyin üstünə xüsusi mavi işıq salmaqla iştahanın azalacağına inanılır. Elmi əsası zəifdir, amma bir ara trend olmuşdu.

Pambıq topu pəhrizi

Pambıq toplarını şirəli içkilərə batırıb yemək… Bəli, qəribə səslənir. Məqsəd mədə doluluğu yaratmaqdır, amma bu, son dərəcə təhlükəli və sağlamlıq üçün zərərlidir.

Yuxu pəhrizi

Bəzi insanlar yemək yeməmək üçün günün çox hissəsini yatmaqla keçirir. Metabolizmanı pozduğu üçün tövsiyə edilmir.

Banan pəhrizi

Yaponiyada populyar olan bu pəhrizdə səhərlər yalnız banan və su qəbul olunur. Sadə görünsə də, uzun müddət davam etdirmək çətindir.

Bütün bu pəhrizlər bir vaxtlar sosial şəbəkələrdə və media gündəmində gurultu yaratsa da, diyetoloqların ortaq fikri dəyişmir: Sağlam qidalanma balans və davamlılıqla mümkündür, möcüzəvi və “qeyri-adi” pəhrizlər isə ya qısamüddətli, ya da zərərli nəticələr verir.

Ləman Sərraf