Süni intellekt nəhəngi OpenAI şirkəti özünün ən qabaqcıl və güclü modeli olan GPT-5.6 seriyasını geniş ictimaiyyət üçün rəsmən istifadəyə verib.

Patrul.az xəbər verir ki, iyun ayının sonundan etibarən ABŞ hökumətinin təhlükəsizlik yoxlamaları səbəbindən yalnız məhdud sayda etibarlı tərəfdaş və təşkilat üçün əlçatan olan bu yeni nəsil süni intellekt modeli artıq qlobal miqyasda bütün istifadəçilər və tərtibatçılar üçün rəsmən satışa çıxarılıb.

Təqdimatın gecikməsi ABŞ-nin Süni İntellekt Standartları və İnnovasiya Mərkəzi (CAISI) tərəfindən aparılan ciddi milli təhlükəsizlik və kiber-audit yoxlamaları ilə bağlı olub. ABŞ rəsmiləri modelin mürəkkəb proqram kodlarındakı boşluqları tapmaq və potensial kiberhücumlarda istifadə edilmə risklərini araşdırıb. Aparılan əlavə sınaqlardan və təhlükəsizlik filtrlərinin gücləndirilməsindən sonra ABŞ hökuməti modelin kütləvi istifadəsinə icazə verib.

OpenAI bu seriya ilə ənənəvi rəqəmsal model adlandırma sistemindən imtina edərək, imkanlarına və qiymətlərinə görə fərqlənən üç xüsusi versiya təqdim edib:

Sol (Günəş): Şirkətin ən qabaqcıl imkanlara malik yeni flaqman modelidir. Dərin məntiqi düşünmə, proqramlaşdırma, biologiya və kibertəhlükəsizlik kimi ən çətin tapşırıqlar üçün nəzərdə tutulub. “Terminal-Bench 2.1” sınaqlarında 88.8% – 91.9% arası rekord effektivlik göstərən bu model, mürəkkəb tapşırıqları alt-agentlərə bölərək paralel icra edən “Ultra” rejiminə sahibdir. Qiyməti hər 1 milyon daxil olan token (input) üçün 5 dollar, çıxan token (output) üçün isə 30 dollardır.

Terra (Yer): Gündəlik biznes prosesləri və peşəkar tapşırıqlar üçün hazırlanmış orta səviyyəli modeldir. OpenAI-ın əvvəlki GPT-5.5 modeli ilə eyni performansı göstərməsinə baxmayaraq, ondan iki dəfə daha ucuz və qənaətcildir. Qiyməti 1 milyon daxil olan token üçün 2.50 dollar, çıxan token üçün 15 dollardır.

Luna (Ay): Maksimal sürət, daha çevik cavab və aşağı büdcəli əməliyyatlar üçün optimallaşdırılmış versiyadır. Sadə, kütləvi sorğuların idarə olunması və mətnlərin çeşidlənməsi üçün ideal seçim hesab olunur. Qiyməti 1 milyon daxil olan token üçün cəmi 1 dollar, çıxan token üçün isə 6 dollar təşkil edir.