XIV-XV əsrin dahi şairi İmadəddin Nəsiminin heç kəsə məlum olmayan şeirləri tapılıb.

Patrul.az xəbər verir ki, Munzur Universitetinin dosenti Dr. İlyas Kayaokay 14-cü əsrin sufi şairi İmadəddin Nəsiminin əvvəllər məlum olmayan altı qəzəlini ehtiva edən əlyazmanı aşkar edib.

Məlumata görə, dəftərin Osmanlı dövründə missionerlik fəaliyyəti ilə əlaqəli ola biləcəyi ehtimal edilir.

Əlyazmada tapılan 172 qəzəlin müqayisəli tədqiqi göstərib ki, həmin qəzəllərdən altısı akademik dünyaya ilk dəfə bu dəftər vasitəsilə təqdim olunur.

Dosent Kayaokay qeyd edib ki, tapılan altı şeir nə Türkiyədə, nə də Azərbaycanda nəşr olunmuş Divan və ya şeir toplularında mövcud deyil. Əlyazmadakı 172 qəzəl Nəsiminin Divanının Türkiyə və Azərbaycanda nəşr olunmuş bütün türk nəşrləri ilə müqayisə olunub.

Araşdırma nəticəsində məlum olub ki, bu qəzəllərdən 23-ü Hüseyn Ayanın hazırladığı Divanın türk nəşrinə daxil edilməyib, 17-si isə müxtəlif şeir toplularında, bəzi hallarda ərəb, bəzilərində isə kiril əlifbası ilə Azərbaycanda nəşr olunmuş Divanlarda qeydə alınıb.

Qeyd edək ki, akademik bu əlyazmaların dünyaya təqdim ediləcəyini vurğulayıb.