Havalar hələ büruzə verməsə də, artıq yay fəsli yaxınlaşır, meyvələr yetişməyə başlayır. Sezonun ən sevilən meyvələrindən biri də alçadır. Bəzi hallarda bu turş, cazibədar meyvə orqanizmə əks təsir göstərə bilər.

Bəs kimlərə alça yemək olmaz?

Patrul.az-ın araşdırmasına görə aşağıda qeyd etdiyimiz göstəricilərə sahib olan şəxslər alçanı ehtiyatla yeməli və ya ümumiyyətlə uzaq durmalıdır:

Mədə problemi olanlar

Əgər sizə qastrit, mədə xorası və ya yüksək turşuluq diaqnozu qoyulubsa, alça vəziyyəti daha da pisləşdirə bilər. Çünki alça turşudur və mədə divarını qıcıqlandırır.

Həzm sistemi həssas olanlar

Alça bağırsaqları sürətləndirir. Bu yaxşı səslənsə də, artıq həssaslıq varsa, ishal, köp və narahatlıq yarada bilər.

Böyrək problemi olanlar

Xüsusilə böyrək daşı olanlar diqqətli olmalıdır. Bəzi turş meyvələr (o cümlədən alça) mineral balansına təsir edə bilər.

Şəkər xəstələri

Alça çox şirin olmasa da, yenə də tərkibində təbii şəkər var. Diabet olanlar miqdarına nəzarət etməlidir. “Bir kasa yeyim, nə olar ki?” yanaşması risklidir.

Allergiyaya meyilli insanlar

Nadir də olsa, alça bəzi insanlarda qaşınma, səpkilər və ya ağızda narahatlıq yarada bilər.

Ac olanlar

Boş mədəyə çoxlu alça yemək ən çox edilən yanlışlardandır. Turşuluq birdən-birə artır, sonra da “niyə mədəm yanır?” sualı ortaya çıxır.

Nə qədər faydalı olsa da, həddini aşanda ən yaxşı şey belə problem yaradır.

Ləman Sərraf