“Aslan Kral” animasiya filminin rejissorlarından biri olan amerikalı rejissor, ssenarist, animator, hekayə rəssamı və dramaturq Rocer Allers 76 yaşında vəfat edib.

Patrul.az xəbər verir ki, bu barədə amerikalı prodüser Deyv Bossert özünün Facebook səhifəsində paylaşım edib.

“Dostumuz Rocer Allersin vəfatını eşidəndə çox kədərləndim. Keçən həftə onunla Misirdə səyahət edərkən yazışmışdıq ki, bu da itkini daha da qeyri-real edir. Rahat yat, dostum. Yenidən görüşənədək”, – deyə Bossert qeyd edib.

Prodüser Rocer Allersi “qeyri-adi istedadlı rəssam və rejissor”, həmçinin “Disney animasiya intibahının əsl sütunlarından biri” kimi xarakterizə edib.

Qeyd edək ki, Rocer Allers ən çox Disney Animation studiyasının bütün dövrlər üzrə ən çox gəlir gətirən ənənəvi animasiya filmi olan “Aslan Kral”ın (1994) rejissoru və eyni adlı Brodvey tamaşasının ssenari müəllifi kimi tanınırdı. O, həmçinin Sony Pictures Animation studiyasının ilk tammetrajlı animasiya filmi olan “Açıq Mövsüm” (2006) və “Peyğəmbər” əsərinin animasiya adaptasiyasının da rejissoru olub.