Nəm salfetlər gündəlik həyatımızda əvəzolunmaz görünür: Çantada, maşında, hətta evdə daim əlimizin altında olur. Lakin onların istifadəsi sağlamlıq üçün bəzən düşündüyümüz qədər zərərsiz sayılmır.

Bəs nəm salfetlər sağlamlığımız üçün hansı təhlükələri daşıyır?

Patrulaz.az-ın araşdırmasına görə, bir çox nəm salfetin tərkibində parfüm, spirt və formaldehid törəmələri kimi kimyəvi maddələr mövcuddur. Bu maddələr uzunmüddətli istifadədə dəridə quruluq, qıcıqlanma və allergiya yarada bilər. Xüsusilə uşaq dərisi bu cür təsirlərə daha həssasdır. Digər tərəfdən, bəzi salfetlərin tərkibində olan paraben və konservantlar hormonal balansı poza biləcək risklər daşıyır.

Həkimlər bildirir ki, nəm salfetlər yalnız zəruri hallarda, məsələn su və sabun olmadıqda istifadə olunmalıdır. Əks halda, ən təhlükəsiz üsul sadə su ilə yuyunmaqdır. Rahatlıq gətirən bu kiçik məhsulun arxasında gizlənən kimyəvi riskləri unutmaq olmaz.

Qısası, nəm salfet “xilas yolu” ola bilər, amma onu vərdiş halına gətirmək sağlamlıq üçün düzgün seçim deyil.

Ləman Sərraf