Soyuq hava çoxları üçün susuzluqla assosiasiya olunmur. Yayda isti günlərdə suya ehtiyac açıq şəkildə hiss edildiyi halda, qış aylarında orqanizmin verdiyi siqnallar çox zaman diqqətdən kənarda qalır. Lakin səhiyyə mütəxəssisləri xəbərdarlıq edir ki, məhz bu səbəbdən qışda susuzlaşma riski daha təhlükəli və daha gizli formada ortaya çıxır. Yorğunluq, diqqət dağınıqlığı, “beyin dumanı” və hətta böyrək problemləri bu səssiz təhlükənin nəticələri arasında yer alır.

Patrul.az-ın araşdırmasına görə, tibb mütəxəssisləri bildirirlər ki, qış aylarında su qəbuluna laqeyd yanaşmaq orqanizmdə bir sıra vacib funksiyaların zəifləməsinə səbəb olur. Aparılan araşdırmaya görə, hava temperaturu aşağı düşdükcə hidratasiya dərinin sağlamlığından tutmuş immun sisteminin fəaliyyətinə qədər hər sahədə həlledici rol oynayır.

Mütəxəssislər qeyd edir ki, orqanizm daxildən kifayət qədər nəmləndikdə bu, dərinin qurumasının qarşısını alır, oynaqların daha rahat hərəkət etməsinə kömək edir və xüsusilə qışda fiziki aktivlik zamanı, məsələn, qar təmizləyərkən  əhəmiyyətli rol oynayır. Bundan əlavə, su qəbulu soyuqdəymə və qrip mövsümündə immuniteti gücləndirərək virus və bakteriyalara qarşı qoruyucu selikli qişa qatının formalaşmasına dəstək verir.

Araşdırmalar göstərir ki, qışda susuzluğun daha az hiss edilməsinin əsas səbəblərindən biri bədənin susuzluq mexanizminin zəifləməsidir. Soyuq aylarda susuzluq reseptorlarının fəaliyyəti təxminən 40 faiz azalır. Bu isə o deməkdir ki, insan susuzluq hiss etdikdə artıq orqanizm müəyyən dərəcədə susuzlaşmış olur.

Digər tərəfdən, quru və soyuq hava dəridən nəmi çəkir, qış aylarında sidiyə getmə tezliyi artır, həmçinin tərləmə davam edir. Sadəcə bu proses yay ayları ilə müqayisədə daha az nəzərə çarpır, çünki soyuq hava tərin daha tez buxarlanmasına səbəb olur.

Susuzlaşmanın sağlamlıq üçün təhlükələri

Mütəxəssislərin fikrincə, susuzlaşmanın ilkin əlamətləri başgicəllənmə, quru dəri, çatlamış dodaqlar, halsızlıq, diqqət və yaddaş zəifliyi kimi özünü göstərə bilər. Lakin uzunmüddətli susuz qalma daha ağır nəticələrə yol aça bilər. Xüsusilə böyrək daşları və böyrək çatışmazlığı riskinin artması ciddi təhlükə kimi qiymətləndirilir.

Bəs gündə nə qədər su içməliyik?

Hamı üçün keçərli olan “gündə səkkiz stəkan su” qaydası hər zaman kifayət etmir. Araşdırmalara əsasən, kişilərin gündə orta hesabla təxminən 3 litr (13 stəkan), qadınların isə 2 litr (9 stəkan) su qəbul etməsi tövsiyə olunur. Hamiləlik və ana südü ilə qidalanma dövründə isə bu ehtiyac daha da arta bilər.

Nəticə olaraq, qış aylarında susuzluq hissinin azalması orqanizmin suya ehtiyacının azaldığı anlamına gəlmir. Əksinə, mütəxəssislər qışda su qəbuluna daha diqqətli yanaşmağın sağlamlıq üçün vacib olduğunu vurğulayırlar.