Qulağın qəfil qızarması çoxlarını maraqlandıran və bəzən “kiminsə məni xatırladı” kimi inanc­larla izah edilən bir haldır. Amma tibbi baxımdan qulaq qızarmasının bir neçə səbəbi var.

Patrulaz.az-ın araşdırmasına görə, bunun ən sadə izahı qan dövranı ilə bağlıdır. Hislərimiz dəyişəndə, xüsusilə həyəcan, əsəb və ya utancaqlıq zamanı damarlar genişlənir, nəticədə qulaq nahiyəsinə daha çox qan toplanır və dəridə qızarma yaranır.

Digər səbəblər arasında günəş şüalarına məruz qalmaq, allergiya, yüksək qan təzyiqi, hətta bəzi dəri xəstəlikləri də ola bilər. Bəzən isə sadəcə temperatur dəyişikliyi – soyuqdan isti mühitə keçmək – bu reaksiyanı yaradır.

Əfsanəvi inanclara görə, sağ qulaq qızaranda kimsə sizi yaxşı, sol qulaq qızaranda isə pis yad edir. Elmi baxımdan bu təsdiqlənməsə də, xalq arasında hələ də geniş yayılıb.

Qısacası, qulaq qızarması çox vaxt zərərsiz bir haldır. Amma tez-tez təkrarlanır, başgicəllənmə və ya ağrı ilə müşayiət olunursa, həkimə müraciət etmək vacibdir. Çünki bəzən bu, sadə emosional reaksiya yox, daha ciddi sağlamlıq probleminin işarəsi ola bilər.

Ləman Sərraf