Şuşa şəhərində, Azərbaycanın azadlıq və qürur simvolu olan Cıdır düzü meydanında duyğulandırıcı bir hadisə yaşanıb. Tarixi torpaqlarımızı ziyarət edən Şəhid anası müqəddəs məkana çatdıqdan sonra qəlbinin dərinliyində gizlənmiş həsrət və kədər hissləri ilə dolub, kövrək anlar keçirərək özünü narahat hiss edib.

Patrulaz.az-ın məlumatına görə, qəhrəman övladını Vətən uğrunda qurban verən həmin ana Cıdır düzündəki müqəddəs mənzərəni gördükdən sonra duyğularına hakim ola bilməyib və halı pisləşərək huşunu itirib.

Bu anda Şuşa şəhər Polis Şöbəsinin əməkdaşları dərhal hadisəyə müdaxilə edərək Şəhid anasına yardım göstəriblər. Onların çevik reaksiyası və qayğısı nəticəsində qadın qısa müddətdə özünə gəlib. Daha sonra isə o, tibbi yardım üçün xüsusi məntəqəyə aparılıb.

Bu hadisə bir daha göstərir ki, Vətən uğrunda canından keçən Şəhidlərimizin valideynləri daim dövlətin və cəmiyyətin diqqətindədir. Hər bir Şəhid anası, hər bir Şəhid atası xalqımız üçün müqəddəsdir və onların yanında olmaq, onlara dəstək göstərmək hər birimizin mənəvi borcudur.

Polis əməkdaşlarının və tibb işçilərinin göstərdiyi bu həssaslıq və humanizm, Şəhid ailələrinə olan hörmətin və dəyərin bariz nümunəsi kimi yaddaşlarda qalacaq.