Azərbaycanda bir çox insan gündəlik su  əvəzinə çay içməyə daha çox üstünlük verirlər. Halbuki bədənimiz, xüsusilə də beynimiz çaydan deyil, təmiz sudan asılıdır. 

Patrul.az-ın araşdırmasına görə, uzunmüddətli susuzluq təkcə fiziki yorğunluq deyil, zehni zəifləmə, unutqanlıq və hətta demensiya riskini artırır.

İnsan beyninin təxminən 75 %-i sudan ibarətdir. Orqanizm susuz qaldıqda beyin hüceyrələri arasında əlaqə zəifləyir, diqqət dağılır, qərarvermə və yaddaş funksiyaları yavaşlayır. Bu proses xüsusilə yaşlı insanlarda daha təhlükəli nəticələrə yol aça bilər.

Nevroloqlar bildirir ki, xroniki susuzlaşma zamanı beyinə gedən qan həcmi azalır. Nəticədə oksigen və qida maddələrinin ötürülməsi zəifləyir, elektrolit balansı pozulur. Bu isə yaddaş problemləri, söz tapmaqda çətinlik və zehni performansın enməsi ilə müşahidə olunur.

Xüsusən də yaşlılar üçün risk daha böyükdür. Belə ki yaş artdıqca susuzluq hissi azalır. İnsan suya ehtiyacı olduğunu hiss etmədiyi üçün gün ərzində kifayət qədər maye qəbul etmir. Bu isə xroniki susuzlaşmaya səbəb olur və zamanla idrak funksiyalarını zəiflədir.

Mütəxəssislərin fikrincə, çay və qəhvə sidikqovucu təsirə malikdir və suyun yerini tuta bilməz. Gündəlik tövsiyə olunan 2-2,5 litr su qəbulu beynin sağlam fəaliyyəti üçün vacibdir. Açıq sarı sidik rəngi orqanizmin kifayət qədər maye qəbul etdiyini göstərən əsas əlamətlərdən biridir.

Unutmamalıyıq ki, susuzluq təkcə halsızlıq yox, düşüncə və yaddaşın səssiz düşmənidir. Xüsusilə yaşlıların və uşaqların maye qəbulu daim diqqətdə saxlanmalıdır.