Telefon istifadəçilərinin demək olar ki, hamısı eyni problemlə üzləşir: batareya tez bitir, şarj gün ərzində çatmır. Əksər hallarda günah batareyada axtarılsa da, əsl səbəb telefonumuzda ən çox istifadə etdiyimiz bəzi tətbiqlərdir.

Patrul.az mövzu ilə bağlı araşdırma aparıb.

Aparılan müşahidələr və istifadə statistikaları göstərir ki, bəzi proqramlar digərlərinə nisbətən qat-qat çox enerji sərf edir və şarjın səssiz şəkildə azalmasına səbəb olur.

Bu siyahının başında sosial şəbəkə nəhəngi “Instagram” dayanır. Daim yenilənən lent, yüksək keyfiyyətli foto və videolar, “story” və “reels” kimi funksiyalar telefonun həm ekranını, həm prosessorunu, həm də internet bağlantısını fasiləsiz işlək vəziyyətdə saxlayır. Üstəlik, tətbiqdən çıxıldıqdan sonra belə arxa planda aktiv qalması “Instagram”ı ən çox şarj yeyən tətbiqlərdən birinə çevirir.

İkinci yerdə “TikTok” gəlir. Qısa videoların ard-arda avtomatik açılması istifadəçiyə zamanın necə keçdiyini hiss etdirmədiyi kimi, batareyanın da necə boşaldığını gizlədir. “TikTok”da yüksək keyfiyyətli videolar, səs effektləri və davamlı internet bağlantısı telefonun enerji sərfiyyatını xeyli artırır. Bir neçə saatlıq istifadə batareyanın böyük hissəsini tükədə bilər.

Üçüncü sırada “YouTube” yer alır. Video izləmək, xüsusilə yüksək keyfiyyətdə və mobil internet üzərindən olduqda, telefon üçün ən enerji tələb edən proseslərdən biridir. Ekranın uzun müddət aktiv qalması, səs sisteminin işləməsi və daimi məlumat ötürülməsi “YouTube”u şarj baxımından təhlükəli tətbiqlər siyahısına salır.

Dördüncü yerdə çoxlarının gün ərzində ən çox istifadə etdiyi “WhatsApp” qərarlaşıb. Sadə mesajlaşma proqramı kimi görünsə də, əslində “WhatsApp” daim serverlə əlaqədə olur, bildirişlər göndərir, media fayllarını avtomatik yükləyir və səsli-görüntülü zənglər zamanı enerjini ciddi şəkildə sərf edir. Xüsusilə qruplarda aktiv olan istifadəçilər bunu daha çox hiss edir.

Beşinci sırada isə “Google Maps” və digər naviqasiya tətbiqləri dayanır. Bu proqramlar eyni anda GPS, internet və ekranı aktiv saxladığı üçün telefonun batareyasını sürətlə boşaldır. Uzunmüddətli yol göstərişi zamanı telefonun isinməsi və şarjın kəskin azalması bunun açıq göstəricisidir.

Nəticə olaraq demək olar ki, telefonun şarjını ən çox azaldan amil təkcə bir tətbiq deyil, onların necə və nə qədər istifadə edilməsidir. Sosial şəbəkələr, video platformaları və naviqasiya proqramları düzgün nəzarət olunmadıqda batareyanın ömrünü xeyli qısalda bilər. Ona görə də bəzən problemi şarj cihazında yox, telefonumuzdakı bu tətbiqlərdə axtarmaq daha doğru olar.

Ləman Sərraf