Donald Tramp Vladimir Putinlə fotosunu yayımlayıb.

Patrulaz.az xəbər verir ki, ABŞ dövlət başçısı bu paylaşımı Parisdə Avropa liderləri ilə telefon danışığından sonra edib.

Sözügedən kadrlar avqustun 15-də Alyaskada keçirilən Tramp və Putin arasında təkbətək görüş zamanı çəkilib. Fotoda Rusiya və ABŞ liderinin birgə poza verərkən üzərlərində uçan B-2 Spirit bombardmançısı və F-35 qırıcılarına baxdıqları əks olunub.

Avropa liderləri ilə danışıqlardan sonra Trampın bu paylaşımı Rusiyaya qarşı yeni sanksiyaların tətbiqinə razılıq verilməyəcəyinə işarə kimi sayılır.

Bundan əvvəl isə bir sıra Qərb KİV-ləri Trampın telefon danışığından sonra Avropa liderlərinin narazılığı və məyusluğu barədə məlumat yayıblar. Nəşrlərin yazdığına görə, söhbət gərgin atmosferdə keçib.

Xatırladaq ki, sentyabrın 4-də Fransanın Yelisey sarayında keçirilən “könüllülər koalisiyası”nın toplantısında bir sıra Avropa liderləri, o cümlədən Fransa Prezidenti Emmanuel Makron və Ukrayna Prezidenti Volodimir Zelenski iştirak ediblər. Görüşə Tramp telefon zəngi ilə qoşulub.

Gülbəniz Səfərova