Gündəlik həyatımızda telefon, planşet, kompüter və televizor artıq ayrılmaz bir hissəyə çevrilib. Lakin bu cihazların yaydığı mavi işığs uzun müddət məruz qalındığında həm göz sağlamlığına, həm də ümumi psixoloji vəziyyətə mənfi təsir göstərir.

Patrulaz.az-ın araşdırmasına görə, ən çox rast gəlinən problem “rəqəmsal göz yorğunluğu”dur. Uzun müddət ekrana baxmaq gözlərdə quruluq, qızartı, bulanıq görmə və baş ağrılarına səbəb olur. Mavi işıq, eyni zamanda, melatonin hormonunun ifrazını azaldaraq yuxu ritmini pozur. Bu da gecə yuxusuzluq, gündüz yorğunluq və diqqət dağınıqlığı ilə nəticələnir.

Bundan başqa, davamlı ekran istifadəsi boyun və kürək ağrılarına (text neck sindromu) yol aça, hətta uzun müddətdə psixoloji gərginlik, əsəbilik və konsentrasiya çətinliyi yarada bilər. Uşaqlar və yeniyetmələr isə xüsusilə risk altındadır – onların görmə sistemi hələ tam formalaşmadığından zərər daha tez özünü göstərir.

Mütəxəssislər hər 20-30 dəqiqədən bir ekrandan baxışı uzağa yönəltməyi, işıqlandırmanı düzgün seçməyi və yatmazdan ən az 1 saat əvvəl cihazlardan uzaqlaşmağı tövsiyə edirlər. Qısacası, ekranlar həyatımızı asanlaşdıra bilər, amma həddindən artıq istifadə sağlamlığımıza baha başa gələ bilər.

Ləman Sərraf