Bir çox insan belə düşünür ki, soyuq hava insanı xəstələndirir. Bu fikir nəsildən-nəslə ötürülüb və xüsusilə qış aylarında daha da aktuallaşır. Çünki soyuq havalarla birlikdə qrip, soyuqdəymə və digər tənəffüs yolu xəstəlikləri daha çox yayılır. Amma müasir elm göstərir ki, məsələ düşündüyümüz qədər sadə deyil.

Patrul.az-ın araşdırmasına görə,, xəstəliklərin birbaşa səbəbi soyuq hava yox, viruslardır. Qrip, soyuqdəymə və oxşar xəstəliklər viruslar tərəfindən törədilir və bu viruslar insandan insana nəfəs yolu və ya təmasla ötürülür. Yəni təkcə üşümək xəstəlik yaratmır.

Bəs niyə xəstəliklər əsasən qışda artır?

Araşdırmalar göstərir ki, qış aylarında xəstəliklərin çoxalmasının səbəbi soyuğun özü deyil, soyuq havanın yaratdığı şəraitdir. Soyuq və quru hava virusların daha uzun müddət yaşamasına kömək edir. Hava quru olduqda öskürək, danışıq və nəfəsalma zamanı havaya yayılan damcılar tez quruyur və viruslar havada daha uzun müddət qala bilir. Bu isə yoluxma riskini artırır.

Bundan başqa, qışda insanlar daha çox qapalı məkanlarda vaxt keçirir, pəncərələr az açılır, havalandırma zəifləyir. Bu da virusların yayılması üçün əlverişli mühit yaradır.

Soyuq hava immunitetə də təsir edir. Soyuqda nəfəs aldıqda burun və boğazın daxili temperaturu aşağı düşür. Bu zaman qan damarları daralır və həmin bölgələrdə bədənin müdafiə sistemi zəifləyir. Nəticədə virusların orqanizmə daxil olması daha asan olur.

Bir sözlə, qışda xəstəliklər təkcə soyuqdan qaynaqlanmır. Əsas səbəb viruslardır, amma soyuq hava onların yayılması üçün şəraiti asanlaşdırır və bədənin müdafiəsini zəiflədir. Buna görə də qış aylarında gigiyenaya diqqət etmək, qapalı məkanları tez-tez havalandırmaq və immuniteti gücləndirmək daha vacibdir.