Müasir kosmetika dünyası rəngarəng görünsə də, mağaza rəflərindəki məhsulların tərkibi çox vaxt dərimizə və ətraf mühitə zərər verən kimyəvi maddələr, mikroplastiklər və sintetik qatqılarla doludur. Üstəlik, təkrar emalı demək olar ki, qeyri-mümkün olan plastik qablaşdırmalar təbiəti çirkləndirir. Bəs, öz kosmetika çantanızı tamamilə təbii, təmiz və ekoloji yolla hazırlamağa nə deyirsiniz?

Evdə makiyaj vasitələri hazırlamaq mağazadan hazır məhsul almaq qədər asan olmasa da, nəticə həm dəriniz, həm də cibiniz üçün möhtəşəm olacaq.

Patrul.az təbiətin bizə bəxş etdiyi inqrediyentlərlə hazırlaya biləcəyiniz 5 əsas resepti təqdim edir:

Gilas dadında dodaq parıldadıcısı (Lip Gloss)

Qarağatın (və ya böyürtkənin) o zəngin piqmenti təkcə barmaqlarımızı deyil, dodaqlarımızı da rəngləyə bilər.

Hazırlanması: 2 xörək qaşığı qarağat tozunu 2 xörək qaşığı qliserin yağında bir həftə saxlayın. Qliserin meyvənin rəngini tam udduqdan sonra qarışığı süzün və meyvə qalıqlarını atın. Eldə etdiyiniz mayeyə 1 xörək qaşığı bal (veqanlar üçün aqave siropu) əlavə edin. Həm parlaqlıq, həm də dərin nəmləndirmə bir arada!

Meyvəli dodaq boyası və ənlik

Pomada hazırlamaq üçün əsas inqrediyentiniz arı mumu və ya neft jelidir.

Hazırlanması: 1 xörək qaşığı mumu (və ya vazelin) su hamamında əridin. İçinə 1 çay qaşığı qliserin, bir az vanil ekstraktı və rəng üçün qida boyası (və ya təbii çuğundur suyu) əlavə edin. Qarışığı boş pomada qabına töküb bir gecə soyuducuda saxlayın. Bu məhsulu yanaqlarınıza çəkərək təbii ənlik kimi də istifadə edə bilərsiniz.

Çuğundur piqmentli rumyana (Ənlik)

Çuğundurun o məşhur bənövşəyi-çəhrayı tonu yanaqlar üçün ideal rəng qaynağıdır.

Hazırlanması: 1 xörək qaşığı nişastaya istədiyiniz tonu alana qədər az-az çuğundur tozu əlavə edin. Şaftalı tonu üçün bir az sarıkök, daha tünd effekt üçün isə kakao tozu qata bilərsiniz. Tozu steril bir qabda saxlayın və fırça ilə tətbiq edin.

Tuş

Kirpiklərinizi həm uzadan, həm də qidalandıran bir resept:

Hazırlanması: 1 çay qaşığı kokos yağı, 1 çay qaşığı E vitamini yağı və yarım çay qaşığı soyunu (mum halında) su hamamında əridin. Üzərinə 3 xörək qaşığı aloe vera geli əlavə edib qarışdırın. Qara rəng əldə etmək üçün apteklərdə satılan 1 ədəd aktivləşdirilmiş kömür kapsulunu əzib içinə tökün. Köhnə, təmizlənmiş tuş qabınız artıq istifadəyə hazırdır!

Göz layneri

Badamın yandırılması ilə əldə edilən kömür dumanlı və dərin baxışlar üçün ən təbii vasitədir.

Hazırlanması: Bir neçə ədəd badamı şam alovunda tam kömürləşənə qədər (təxminən 10 dəqiqə) yandırın. Soyuduqdan sonra onları həvəngdəstədə toz halına gətirin. Qatı pasta halına gəlməsi üçün bir neçə damcı qliserin və ya kokos yağı əlavə edin. İncə fırça ilə tətbiq etdiyinizdə mağaza məhsullarından heç bir fərqi olmadığını görəcəksiniz.

Bu reseptlər vasitəsilə siz həm plastik tullantıları azaldır, həm də dərinizi naməlum kimyəvi maddələrdən qoruyursunuz. Unutmayın ki, təbiət bizə gözəlləşmək üçün ehtiyac duyduğumuz hər şeyi təqdim edir!