Heç düşünmüsünüzmü, niyə bəzən qəfil şirniyyat istəyirsiniz və ya heç bir səbəb olmadan müəyyən bir yeməyə qarşı qarşısıalınmaz həvəs yaranır? Biz bunu öz “istəyimiz” zənn edirik, amma elm deyir ki, bu, daxilimizdəki trilyonlarla kiçik canlının – bakteriyaların manipulyasiyasıdır. Biz sadəcə bir orqanizm deyil, nəhəng bir mikrob koloniyasının “ev sahibiyik”.

Patrul.az-ın araşdırmalarına görə, aparılan son elmi təhlillər və tibbi araşdırmalar göstərir ki, bağırsaq mikrobiotası ilə beyin arasında birbaşa əlaqə xətti (bağırsaq-beyin oxu) mövcuddur. Bu araşdırmalardan çıxan maraqlı faktlar bunlardır:

İştah manipulyasiyası: Bağırsağınızdakı bəzi bakteriya növləri sağ qalmaq üçün şəkər və ya yağla qidalanmalıdır. Onlar bu qidanı əldə etmək üçün qan dövranına xüsusi kimyəvi maddələr buraxaraq beyinə “mənə şirniyyat ver” siqnalı göndərirlər. Yəni o şokoladı siz yox, bağırsağınızdakı bakteriyalar tələb edir.

Vagus sinir, gizli magistral: Bakteriyalar beyinlə birbaşa əlaqə qurmaq üçün bədənin ən uzun siniri olan Vagus sinirindən istifadə edirlər. Onlar dopamin və serotonin (xoşbəxtlik hormonları) səviyyəsinə təsir edərək, bizə nəyi yeyəndə özümüzü yaxşı, nəyi yeyəndə isə pis hiss edəcəyimizi diktə edirlər.

Psixoloji təsir: Araşdırmalar sübut edir ki, bağırsaq florası pozulmuş şəxslərdə təşviş və depressiya halları daha çox müşahidə olunur. Bu o deməkdir ki, mikroblar təkcə iştahınızı deyil, həm də gündəlik əhvalınızı idarə edir.

Növbəti dəfə “canım bunu istədi” deyəndə bir anlıq dayanıb düşünün: Bu həqiqətən sizin iradənizdir, yoxsa daxilinizdəki trilyonlarla “kirayənişinin” növbəti sifarişi? Sükanı yenidən ələ almağın tək yolu sağlam və balanslı qidalanmaqla həmin bakteriyaların tərkibini dəyişməkdir.

Cəmilə Cəfərzadə