ABŞ-ın Federal Təhqiqat Bürosu (FBI) İranın mümkün pilotsuz uçuş aparatları ilə hücum planları ilə bağlı xəbərdarlıq yayıb.

Patrul.az xarici mediaya istinadən xəbər verir ki, ABŞ təhlükəsizlik qurumları İranın kamikaze dronlardan istifadə etməklə Kaliforniya ştatına qarşı hücum ehtimalını nəzərdən keçirir.

Bildirilir ki, məsələ ilə bağlı hüquq-mühafizə orqanlarına göndərilən xəbərdarlıqda İranın ABŞ-ın qərb sahillərinə qarşı pilotsuz uçuş aparatları vasitəsilə mümkün hücum ssenarilərinin qiymətləndirildiyi qeyd olunub. Məlumatlarda belə bir hücumun ABŞ sahillərinə yaxın ərazilərdən və ya dənizdən həyata keçirilə biləcəyi ehtimalı da istisna edilmir.

FBI tərəfindən yayılan məlumatda hücumun dəqiq vaxtı və hədəfi ilə bağlı konkret məlumatın olmadığı bildirilir. Buna baxmayaraq, ehtimal olunan təhlükə səbəbindən Kaliforniya ştatında fəaliyyət göstərən hüquq-mühafizə orqanlarına diqqətli olmaları və təhlükəsizlik tədbirlərini gücləndirmələri tövsiyə olunub.

Məlumatlar ABŞ və İran arasında son dövrlərdə artan gərginlik fonunda gündəmə gəlib. Analitiklər hesab edirlər ki, pilotsuz uçuş aparatlarının müasir müharibələrdə geniş istifadə olunması belə ssenarilərin təhlükəsizlik qurumları tərəfindən ciddi şəkildə nəzərdən keçirilməsinə səbəb olur.

ABŞ rəsmiləri isə bildirirlər ki, hazırda Kaliforniyaya qarşı planlaşdırılan konkret hücum barədə təsdiqlənmiş məlumat yoxdur və yayılan xəbərdarlıq daha çox ehtiyat xarakteri daşıyır. Bununla belə, vəziyyətin nəzarətdə saxlanıldığı və təhlükəsizlik xidmətlərinin mümkün riskləri diqqətlə izlədiyi qeyd olunur.