Ötən ilin oktyabr ayında Fransanın Luvr muzeyində baş verən soyğunçuluq zamanı oğruların əlindən düşən tacın görüntüsü paylaşılıb.

Patrul.az xəbər verir ki, imperatriça Yevgeniyaya məxsus 170 illik zümrüd tac Luvr mütəxəssislərinin hazırladığı hesabata əsasən ciddi zədələnib. Bildirilib ki, oğrular möhkəmləndirilmiş şüşə vitrində dar bir kəsik açaraq tacı zorla çıxarıblar. Bu zaman tac əzilib, qaçış zamanı yerə düşdüyü üçün isə daha da zədələnib. Tacın üzərindəki 10 ədəd brilyantın itkin düşdüyü qeyd olunub.

Məlumata görə, tarixi eksponatın bərpası nəzərdə tutulur.

Qeyd edək ki, tac 1855-ci ildə III Napoleon tərəfindən özü və həyat yoldaşı Yevgeniya üçün sifariş edilib. Rəsmi tacqoyma mərasimi keçirilməsə də, bu tac imperiya rəmzi kimi yaradılmışdı.

Gülbəniz Səfərova