“ChatGPT” süni intellekt platformasının yaradıcısı olan “OpenAI” şirkəti özünün ən yeni və güclü modeli olan GPT-5.5-i (kod adı: “Spud”) təqdim edib.

Patrul.az xəbər verir ki, şirkətin məlumatına görə, bu model yalnız sualları cavablandırmaqla kifayətlənmir, eyni zamanda tam avtonom “agent” kimi fəaliyyət göstərmək qabiliyyətinə malikdir.

Yeni “GPT-5.5” modelinin əsas fərqləndirici xüsusiyyəti onun çoxmərhələli iş proseslərini insan müdaxiləsi olmadan planlaşdırıb icra etməsi və yekun nəticəni yoxlaya bilməsidir.

Bildirilir ki, model “GPT-5.4” ilə eyni cavab sürətini qoruyub saxlayır, lakin daha az giriş məlumatı (token) sərf etməklə daha mürəkkəb mühakimələr yürüdə bilir.

OpenAI-ın həmtəsisçisi Qreq Brokman məsələ ilə bağlı bildirib ki, dünya artıq iş səmərəliliyinin süni intellekt gücü ilə ölçüldüyü yeni bir iqtisadi dövrə – “hesablama iqtisadiyyatına” qədəm qoyur.

Həmçinin qeyd olunub ki, bu model ofis işlərində, proqramlaşdırmada və elmi tədqiqatlarda sadəcə köməkçi deyil, prosesləri başdan sona idarə edən “virtual menecer” rolunda çıxış edir.