“Təcavüzkar Ermənistanın işğalından azad edilmiş Qarabağ və Şərqi Zəngəzur iqtisadi rayonlarında aparılan tikinti və quruculuq işlərinin miqyası çox genişdir, dünyada tayı-bərabəri yoxdur. Dövlət suverenliyimizin bərpasından qısa müddət keçməsinə baxmayaraq, cənab Prezident İlham Əliyevin rəhbərliyi altında Azərbaycan dövləti müasir yaşayış komplekslərini, infrastrukturu quraraq keçmiş məcburi köçkün bacı-qardaşlarımızı doğma yurdlarına qaytarıb. Bu işlərlə paralel olaraq məktəblər, xəstəxanalar, mədəniyyət abidələri də tikilib”.

Bu sözləri Patrulaz.az-a açıqlamasında Milli Məclisin sədr müavini Musa Qasımlı deyib.

Deputat bildirib ki, Ermənistanın məhv etməyə çalışdığı tarix və mədəniyyət abidələrimiz həm dövlət büdcəsi, həm də Mehriban xanım Əliyevanın rəhbərliyi altında Heydər Əliyev Fondu tərəfindən bərpa edilərək millətimizə qaytarılıb: “İndiyədək işğaldan azad edilmiş ərazilərə təxminən 40 mindən çox vətəndaşımız qayıdıb. İşğaldan azad edilmiş ərazilərdə müasir yollar, tunellər çəkilib. Xəyallara gəlməyəcək olan işlər – “Füzuli Beynəlxalq Hava Limanı”, “Zəngilan Hava Limanı” tikilib istifadəyə verilib. Laçında hava limanı tikilir. Bütün bunlarla yanaşı, işğaldan azad edilmiş ərazilərdə sanatoriya-kurort sisteminin inkişafı üçün böyük işlər görülür. Kəlbəcərdə “İstisu” sanatoriyası tikilir. Görülən işlər barədə çox danışmaq olar. Amma bütün bunlar onu göstərir ki, ölkədə bütün işlər, o cümlədən, Qarabağ və Şərqi Zəngəzur iqtisadi rayonlarında aparılan tikinti-quruculuq işləri dövlətimizin aydın strategiyası əsasında planlı şəkildə edilir”.