Yunanıstanın Krit adasında səmanın qırmızı rəngə boyandığını əks etdirən qeyri-adi görüntülər yayılıb.

Patrul.az xəbər verir ki, buna səbəb Yunanıstanda müşahidə olunan şiddətli hava şəraiti nəticəsində Afrikadan (Sahara səhrasından) gələn güclü cənub küləklərinin toz və qum hissəciklərini Aralıq dənizi üzərindən Krit adasına və ölkənin digər bölgələrinə daşıması olub.

“Erminio” fırtınası adlandırılan bu təbiət hadisəsi nəticəsində səma qeyri-adi şəkildə narıncı və qırmızı rəngə boyanıb.

Havanın keyfiyyətinin pisləşməsi və görmə məsafəsinin azalması səbəbindən Krit, Kiklad və Dodekanes adalarında bəzi məktəblər bağlanıb və ya distant təhsilə keçib.

İraklion hava limanında uçuşlar təxirə salınıb və ya digər hava limanlarına yönləndirilib.

Meteoroloqlar bildiriblər ki, Yunanıstanda toz hissəciklərinin tədricən azalacağı gözlənilir. Eyni zamanda küləyin sürətinin 8 baladək (saatda 62–74 kilometr) çatacağı proqnozlaşdırılır.

Tozdan qorunmaq üçün üz və ağız nahiyələrini bağlayan insanların qırmızı rəngə bürünmüş hava şəraitində çəkilən görüntüləri sosial şəbəkələrdə böyük maraqla qarşılanıb.

Patrul.az həmin mənzərə zamanı çəkilmiş fotoları təqdim edir:

Gülbəniz Səfərova