“Düşünürəm ki, hamımız bu cinayətkar rejimlə 47 illik əlaqədən sonra bu sistemin nəhayət çökməsi və İran xalqının süqut günündə həqiqətən layiq olduğu şeyə – tam azadlığa, yenidən yaşamaq və ölkəni tərəqqi etdirərək inkişaf etdirmək imkanına nail olması üçün günləri sayırıq. Ümid edirəm ki, bu gün mümkün qədər tez gələcək”.

Patrul.az xarici KİV-ə istinadla xəbər verir ki, bunu İranın sonuncu şahı Məhəmmədrza Pəhləvinin oğlu Rza Pəhləvi deyib.

O, İran hökumətini xalqa zülm etməkdə ittiham edərək, xalqı onu devirməyə çağırıb:

“Amma biz şəraiti də nəzərə almalıyıq. Hamımızın gördüyümüz kimi, bu rejim xalqı əzməkdən çəkinmir, yüz minlərlə insanı öldürməyə hazırdır və buna baxmayaraq hakimiyyətdə qalmağa çalışır. Buna görə də hərəkat ağıllı şəkildə davam etməlidir. Son çağırış vaxtında veriləcək və fürsət yaranacaq”.

Şahzadə mövcud vəziyyətdə repressiv qüvvələrin mümkün qədər zəiflədilməli olduğunu vurğulayıb. O bildirib ki, İsrail və ABŞ Prezidenti tərəfindən həyata keçirilən hava hücumları bu baxımdan güc balansının dəyişməsi üçün mühüm rol oynayır:

“Bu kampaniya rejimin İİKK və Bəsic kimi repressiv strukturlarına çox ağır zərbə vurub”.

Məlumat üçün bildirək ki, Rza Pəhləvi İranın son şahı Məhəmmədrza Pəhləvinin oğludur və monarxiya dövrünün varisi hesab olunur. O, hazırda əsasən xaricdə yaşayır və özünü İran xalqının alternativ siyasi liderlərindən biri kimi təqdim edir. Pəhləvi ölkədə demokratiyanın qurulmasını, insan haqlarının qorunmasını və mövcud rejimin dəyişməsini müdafiə edir.