Onilliklərdir alimlər kainatı radio dalğaları və lazer siqnalları vasitəsilə izləyir. Məqsəd kainatda başqa (yadplanet) həyatın mövcud olub-olmadığını müəyyən etməkdir. Lakin indiyədək Yerə yadplanetli sivilizasiyalardan açıq-aşkar siqnal daxil olmayıb.

Patrul.azxəbər verir ki, bu mövzu ilə bağlı İsveçrənin Lozanna şəhərində yerləşən EPFL-də çalışan fizik Klaudio Qrimaldi yeni araşdırma aparıb.

Araşdırmaya görə, yadplanetli sivilizasiyaların göndərdiyi siqnallar artıq Yerə çatmış ola bilər. Lakin həmin an müşahidə cihazlarının düzgün istiqamətdə olmaması səbəbindən bu siqnallar qeydə alınmayıb.

Qrimaldi bildirib ki, 1960-cı ildən bəri kainat radio dalğaları ilə skan edilsə də, bütün istiqamətləri eyni vaxtda izləmək mümkün deyil. Bu səbəbdən bəzi siqnallar diqqətdən kənarda qala bilər.

Alimin hazırladığı statistik model göstərir ki, minlərlə siqnalın Yerə yaxın məsafədən keçməsi ehtimalı çox aşağıdır. Əgər texnoloji izlər mövcuddursa, onlar əsasən minlərlə işıq ili uzaqlıqdan gələ bilər.

Buna görə də, mütəxəssislər axtarışların yalnız yaxın ulduz sistemlərində deyil, qalaktikanın daha dərin hissələrində aparılmasının vacibliyini vurğulayırlar.

Araşdırmada qeyd olunur ki, gələcəkdə daha güclü teleskoplar və süni intellekt əsaslı analiz sistemləri sayəsində bu cür zəif siqnalların aşkarlanması mümkün ola bilər.

Qrimaldinin fikrincə, insanlıq kainatda tək olmaya bilər, sadəcə hələlik düzgün vaxtda və düzgün istiqamətdə müşahidə aparılmayıb.

Alimlərin qənaətinə görə, yadplanetli siqnallarının tapılması hələ də real ehtimaldır. Bunun üçün müşahidə imkanlarının genişləndirilməsi və yeni texnologiyalardan istifadə əsas şərt sayılır. Mütəxəssislər hesab edirlər ki, gələcəkdə kosmosdan gələn ilk real mesajın qeydə alınması mümkündür.