Yataq otağı insanın günün yorğunluğunu atdığı, zehni və fiziki olaraq dincəldiyi ən vacib məkanlardan biridir. Bu otağın kiçik, lakin təsiri böyük detallardan biri isə yataq masasıdır. Çoxları fərqinə varmadan bu masanı lazımsız əşyalarla doldurur. Halbuki yataq masasındakı qarışıqlıq birbaşa yuxu keyfiyyətinə təsir göstərir.

Patrul.az-ın apardığı araşdırmaya görə, daxili dizaynerlər və təşkilat mütəxəssisləri yataq masasının sadə və funksional saxlanılmasının istirahət rejimini yaxşılaşdırdığını vurğulayır. Onların fikrincə, yatmazdan əvvəl və oyandıqdan sonra ilk toxunduğumuz bu məkan nə qədər səliqəli olarsa, beyin də bir o qədər rahatlanar.

Yataq masasından uzaq tutulacaq olan əşyalar bunlardır:

İçkiləri açıq saxlamayın. Yataq masasında açıq su stəkanları və ya çay fincanları tökülmə riski yaradır, həmçinin səthin zədələnməsinə səbəb ola bilər. Gecə susuzluq halları üçün qapaqlı stəkanlardan istifadə etmək daha təhlükəsiz hesab olunur.

Kağız yığınları zehni yorur. Qəbzlər, qeydlər və müxtəlif sənədlər vizual qarışıqlıq yaradır. Bu da beynin rahatlanmasını çətinləşdirir. Mütəxəssislər bu cür kağızların yataq otağından kənarda saxlanılmasını məsləhət görür.

Zinət əşyaları itə bilər. Üzük, sırğa kimi kiçik zinət əşyaları asanlıqla düşə və itib-bata bilər. Onların yataq masası üzərində deyil, xüsusi qutularda saxlanılması tövsiyə olunur.

Telefon və planşetlər yuxunu pozur. Elektron cihazlar yalnız kabellərin qarışmasına səbəb olmur, eyni zamanda gecə ekran istifadəsini artıraraq yuxu rejimini pozur. Mütəxəssislər yatmazdan əvvəl telefonun yataq masasından uzaq tutulmasını məsləhət görür.

Dərmanlar göz önündə olmamalıdır. Dərmanların yataq masası üzərində saxlanılması həm təhlükəsizlik, həm də səliqə baxımından uyğun sayılmır. Onların çekmecede və ya ayrıca qutuda saxlanması daha məqsədəuyğundur.

Kitab yığınlarından çəkinin. Bir neçə kitab istisna olmaqla, yataq masasında çoxlu kitab yığmaq yer itkisinə və vizual ağırlığa səbəb olur. Oxunacaq kitab seçilərək digərlərinin kənara qoyulması tövsiyə edilir.

Böyük dekorativ əşyalar yer tutur. Böyük vazalar və iri dekor elementləri yataq masasının funksionallığını azaldır. Dizaynerlərin fikrincə, bu məkan mümkün qədər sadə və əlçatan saxlanmalıdır.

Yekun olaraq bildirək ki, yataq masasının minimal və səliqəli olması zehni rahatlamanı təşviq edir, stres səviyyəsini azaldır və daha keyfiyyətli yuxuya şərait yaradır.