ABŞ-ın Arizona ştatında yerləşən və dünyanın ən qeyri-adi təbii formalaşmalarından biri hesab olunan “Arizona Dalgası” (The Wave) öz möhtəşəm görünüşü ilə hər il minlərlə turistin və tədqiqatçının diqqətini cəlb edir.

Patrul.az xəbər verir ki, mütəxəssislərin məlumatına görə, bu unikal geoloji formalaşma təxminən 190 milyon il əvvəl, Yura dövründə yaranıb. Əsasən qumdaşı süxurlarından ibarət olan ərazi milyonlarla il ərzində küləyin, yağışın və temperatur dəyişikliklərinin təsiri altında indiki görünüşünü alıb.

Dalğanı xatırladan qırmızı, narıncı və sarı rəngli laylar təbiətin yaratdığı əsl sənət əsəri kimi qiymətləndirilir. Formalaşmanın qeyri-adi quruluşu səbəbindən burada çəkilən fotoşəkillər tez-tez kompüter qrafikası və ya süni intellekt məhsulu hesab edilsə də, ərazi tamamilə təbii proseslərin nəticəsidir.

Arizona Dalgası ABŞ-ın Arizona və Yuta ştatlarının sərhədində yerləşən Vermilion Cliffs Milli Qoruğunun ərazisində yerləşir. Ərazinin həssas ekosistemini qorumaq məqsədilə gündəlik ziyarətçi sayı ciddi şəkildə məhdudlaşdırılır və giriş yalnız xüsusi icazə əsasında mümkündür.

Geoloqlar bildirirlər ki, bu möhtəşəm təbiət abidəsi Yer kürəsinin milyonlarla illik tarixini əks etdirən nadir geoloji irslərdən biridir və planetimizin keçmişinə işıq salan canlı sübut hesab olunur.