Çin son onilliklərdə həyata keçirdiyi nəhəng ekoloji layihə sayəsində minlərlə kvadrat kilometr səhralaşmış ərazini yenidən həyata qaytarmağa nail olub.

Patrul.az xarici mediaya istinadən xəbər verir ki, ölkə indiyədək təxminən 45 min kvadrat kilometrdən çox səhralaşmış torpağı bərpa edib. Bu ərazi ölçüsünə görə İsveçrə və ya Niderlanddan daha böyük hesab olunur.

Əldə edilən uğur Çinin 1978-ci ildə başladığı və “Böyük Yaşıl Divar” (Three-North Shelterbelt Program) adlandırılan genişmiqyaslı meşəsalma proqramının nəticəsi kimi qiymətləndirilir. Layihənin əsas məqsədi ölkənin şimal hissəsində yerləşən Qobi və Taklamakan səhralarının genişlənməsinin qarşısını almaq, torpaq eroziyasını azaltmaq və toz fırtınalarının təsirini zəiflətməkdir.

Layihə çərçivəsində milyardlarla ağac əkilib, qum təpələrinin hərəkətini dayandırmaq üçün xüsusi tədbirlər görülüb, otlaq sahələri bərpa olunub və yerli əhali torpaqların qorunmasına cəlb edilib. Mütəxəssislər bildirirlər ki, ağaclar və kol bitkiləri küləyin sürətini azaldır, torpağı möhkəmləndirir və səhralaşmanın qarşısını alır.

Rəsmi məlumatlara əsasən, layihə nəticəsində Çində meşə örtüyünün payı son onilliklər ərzində əhəmiyyətli dərəcədə artıb. 2024-cü ildə ölkə Taklamakan səhrasının ətrafında 3 min kilometrlik yaşıl zolağın tamamlandığını açıqlayıb. Hazırda Çində meşə ilə örtülü ərazilərin payı 25 faizdən çoxdur.

Bununla belə, bəzi alimlər layihənin müəyyən çətinliklərlə də üzləşdiyini bildirirlər. Su çatışmazlığı, bəzi ağac növlərinin yüksək məhv olma faizi və səhralaşmanın tam dayandırılmaması əsas problemlər sırasında göstərilir. Buna baxmayaraq, Çin dünyanın ən böyük yaşıllaşdırma proqramlarından birini həyata keçirərək səhralaşma ilə mübarizədə mühüm nəticələr əldə edən ölkələrdən biri hesab olunur.