Patrul.az redaksiyasına müraciət edən izləyicimizin bildirdiyinə görə, Bakı şəhəri, Atatürk prospekti 42 ünvanında 99-RD-921 dövlət qeydiyyat nişanlı “Niva” markalı nəqliyyat vasitəsi artıq üç gündür eyni yerdə dayanıb.

Müraciətdə qeyd olunur ki, avtomobilin sahibi üç gündür ərazidə görünməsə də, nəqliyyat vasitəsinin yanında olan it həmin ərazini tərk etmir. Şahidlərin sözlərinə görə, heyvan gün ərzində avtomobilin ətrafında dolaşır və gecə saatlarında da maşının yaxınlığında qalır.

Hadisənin ən diqqətçəkən tərəfi isə itin sahibinə olan sədaqətidir. İddialara görə, üç gün ərzində sahibindən heç bir xəbər olmasa da, heyvan avtomobilin yanından uzaqlaşmır və sanki sahibinin geri dönəcəyini gözləyir.

Ərazidə yaşayan sakinlər və yoldan keçən vətəndaşlar bu mənzərənin onları duyğulandırdığını bildirirlər. Bəzi şəxslər itin qidalanmasına kömək etsələr də, onun əsasən avtomobilin yaxınlığında qalmağa üstünlük verdiyi qeyd olunur.

Hazırda avtomobilin sahibinin harada olduğu və nəqliyyat vasitəsinin niyə bu qədər müddətdir həmin ərazidə saxlanıldığı məlum deyil. Məsələ ilə bağlı əlavə məlumat əldə edilərsə, Patrul.az tərəfindən ictimaiyyətə təqdim olunacaq.