Birləşmiş Millətlər Təşkilatı İsrail və ABŞ-nin İrana qarşı başlatdığı əməliyyatdan sonra paytaxt Tehranı tərk edənlərin sayını açıqlayıb.

Patrul.az xarici KİV-ə istinadla xəbər verir ki, Birləşmiş Millətlər Təşkilatının Qaçqınlar üzrə Ali Komissarlığı (UNHCR) tərəfindən verilən son məlumata görə, 2026-cı ilin mart ayının əvvəlində başlayan hərbi əməliyyatların ilk iki günündə təxminən 100.000 insan Tehranı tərk edib.

BMT-nin Qaçqınlar üzrə Ali Komissarlığının sözçüsü Babar Baloçun sözlərinə görə, hər gün paytaxtdan 1000-2000 arasında nəqliyyat vasitəsi çıxır. Sakinlərin əksəriyyəti daha təhlükəsiz hesab edilən şimal istiqamətinə üz tutur.

Hazırda qonşu ölkələrlə sərhədlərdə kütləvi axın müşahidə olunmasa da, BMT rəsmisi vəziyyəti “qeyri-sabit və dəyişkən” kimi qiymətləndirib.

Münaqişə təkcə İranda deyil, Livanda da ciddi yerdəyişmələrə səbəb olub. Livanda artıq 30.000-dən çox insan evlərini tərk edərək sığınacaqlara yerləşib.

BMT rəsmiləri regionda onsuz da milyonlarla qaçqının (xüsusilə əfqan və suriyalıların) olduğunu və yeni münaqişənin humanitar imkanları üstələyə biləcəyini vurğulayırlar.

Gülbəniz Səfərova