Yay mövsümündə minlərlə azərbaycanlı istirahət üçün müxtəlif ölkələrə üz tutur. Sosial şəbəkələrdə paylaşılan rəngarəng səyahət görüntülərinin arxasında isə bəzən maddi itki, təhlükəsizlik problemləri və planların pozulması ilə nəticələnən sadə səhvlər dayanır.

Patrul.az bu dəfə xaricə səyahət edən turistlərin ən çox yol verdiyi yanlışları araşdırıb.

Araşdırmalar və beynəlxalq turizm sahəsində yayımlanan tövsiyələr göstərir ki, turistlərin etdiyi səhvlərin əksəriyyəti diqqətsizlik, hazırlıqsızlıq və yerli qaydalar barədə məlumatsızlıqdan qaynaqlanır. Bunlardan biri bütün pul və bank kartlarını eyni yerdə saxlamaqdır. Oğurluq və ya itki baş verdikdə turist həm nağd vəsaitini, həm də ödəniş imkanını eyni anda itirə bilər.

Digər geniş yayılmış səhv pulsuz ictimai Wi-Fi şəbəkələrinə qoşularaq bank əməliyyatları aparmaqdır. Kiber təhlükəsizlik mütəxəssisləri belə şəbəkələrdə şəxsi məlumatların oğurlanması riskinin daha yüksək olduğunu bildirirlər.

Bir çox turist səyahət sığortasını lazımsız xərc hesab edərək almır. Halbuki qəfil xəstəlik, qəza, baqajın itməsi və ya reysin ləğvi kimi hallarda sığorta ciddi maliyyə itkilərinin qarşısını ala bilər.

Mütəxəssislər həmçinin pasportun yalnız telefon şəklinə güvənməyi də riskli hesab edirlər. Sənədlərin kağız surətini və ya təhlükəsiz rəqəmsal ehtiyat nüsxəsini saxlamaq fövqəladə hallarda prosesi xeyli asanlaşdıra bilər.

Turistlərin tez-tez etdiyi digər səhvlər arasında yerli qanun və adət-ənənələri araşdırmamaq, valyuta məzənnəsini öyrənmədən alış-veriş etmək, telefon rouminq xərclərini əvvəlcədən yoxlamamaq və hava şəraitinə uyğun hazırlıq görməmək də yer alır.

Araşdırmanın nəticəsi göstərir ki, uğurlu səyahət təkcə düzgün istiqamət seçməkdən ibarət deyil. Kiçik görünən hazırlıq mərhələləri həm təhlükəsizliyi artırır, həm də gözlənilməz xərclərin və xoşagəlməz hadisələrin qarşısını almağa kömək edir.

Cəmilə Cəfərzadə