Los-Ancelesin mərkəzində iğtişaşlara görə komendant saatı elan edilib.

Patrulaz.az xəbər verir ki, ABŞ-nin Kaliforniya ştatının ən böyük şəhəri olan Los-Ancelesdə baş verən etirazlar və zorakılıq halları nəticəsində komendant saatı tətbiq edilib.

Bu barədə Los-Ancelesin meri Karen Bass keçirdiyi mətbuat konfransında məlumat verib. Onun sözlərinə görə, şəhərdəki vandalizm və qarət halları ilə mübarizə məqsədilə fövqəladə addımlar atılıb.

“Vandalizm və qarətçiliyə son qoymaq üçün Los-Ancelesin mərkəzində komendant saatı tətbiq edirəm. Əgər Los-Ancelesin mərkəzində yaşamır və işləmirsinizsə, bu ərazidən uzaq durun. Hüquq-mühafizə orqanları komendant saatını pozanları saxlayacaq”, – deyə mer bildirib.

Qərara əsasən, məhdudiyyətlər çərşənbə axşamı yerli vaxtla saat 20:00-da qüvvəyə minəcək və çərşənbə günü saat 06:00-a qədər davam edəcək.

Qeyd edək ki, iğtişaşlar iyunun 7-də ABŞ İmmiqrasiya və Gömrük Nəzarəti Xidmətinin Los-Ancelesdə keçirdiyi reyddən sonra başlayıb. Həmin əməliyyat zamanı qanunsuz miqrantların müəyyən edilməsi məqsədilə genişmiqyaslı yoxlamalar aparılıb. Baş verən hadisələrdən sonra Ağ ev şəhərə 2 min nəfərdən ibarət milli qvardiya əsgərinin göndəriləcəyini açıqlayıb.