Yay aylarında günəş şüalarının intensivliyi artdıqca gün eynəyi təkcə dəb aksessuarı deyil, həm də gözləri ultrabənövşəyi (UV) şüalardan qoruyan vacib vasitəyə çevrilir. Mütəxəssislər xəbərdarlıq edirlər ki, yalnız görünüşünə görə seçilən keyfiyyətsiz eynəklər göz sağlamlığı üçün risk yarada bilər.

Patrul.az-ın araşdırmalarına görə, oftalmoloqlar gün eynəyi seçərkən ilk növbədə linzanın 100% UV400 qorumasına malik olmasına diqqət yetirməyi tövsiyə edirlər. Tünd rəngli linza hər zaman yüksək qoruma demək deyil. Əgər eynək UV filtri ilə təchiz olunmayıbsa, tünd linza göz bəbəyini genişləndirə və zərərli şüaların gözə daha çox daxil olmasına səbəb ola bilər.

Araşdırmalarda qeyd olunur ki, boz, qəhvəyi və yaşıl tonlu linzalar rəngləri daha təbii göstərdiyi üçün gündəlik istifadə üçün daha uyğundur. Gözləri tam örtən və üzə uyğun çərçivələr isə yan tərəfdən daxil olan günəş şüalarının da qarşısını almağa kömək edir.

Mütəxəssislər həmçinin küçə satıcılarından mənşəyi məlum olmayan ucuz eynəklər almaqdansa, sertifikatlı məhsullara üstünlük verməyi məsləhət görürlər.

Yay eynəyi seçərkən əsas meyar dəb deyil, göz sağlamlığı olmalıdır. Düzgün seçilmiş UV qoruyuculu eynək gələcəkdə yarana biləcək bir çox göz probleminin qarşısını almağa kömək edə bilər.

Cəmilə Cəfərzadə